Dua Lipa dhe Callum Turner shijojnë një arratisje romantike në Paris
Dua Lipa dhe Callum Turner janë parë së fundmi duke shijuar atmosferën e “Qytetit të Dashurisë”, teksa kaluan një pasdite të qetë në Paris. Këngëtarja 30-vjeçare dhe aktori 36-vjeçar dolën për një shëtitje me qenin e tyre, ndërsa kryenin edhe disa angazhime të përditshme së bashku.
Për daljen e tyre, autorja e hitit Don't Start Now ishte veshur me një pallto të ngrohtë ngjyrë kafe me lesh dhe një kapele sportive jeshile, duke kombinuar stilin casual me elegancën që e karakterizon. Nga ana tjetër, Turner u shfaq me një pallto ngjyrë blu të errët dhe xhinse, duke ruajtur një profil të thjeshtë, por të rafinuar.
Dalja e tyre në kryeqytetin francez vjen vetëm një javë pasi artistja tërhoqi vëmendjen në tapetin e kuq në Berlin, ku mori pjesë në një festival ndërkombëtar filmi për të mbështetur partnerin e saj në premierën e projektit të tij më të ri, Rosebush Pruning.
Paraqitja e çiftit ka shtuar edhe më shumë interesin e mediave rozë për marrëdhënien e tyre, ndërsa në një intervistë të fundit aktori u pyet edhe për thashethemet që e lidhin me një rol të mundshëm në sagën e James Bond. Turner reagoi me rezervë, duke mos konfirmuar asgjë, por duke lënë të hapur mundësinë për projekte të mëdha në të ardhmen.
