FIFA është e gatshme ta aprovojë rritjen e numrit të Kombëtareve pjesëmarrëse në Kupën e Botës.
“Sky News” mëson se shtëpia e futbollit botëror po planifikon ta rritë nga 32 në 48 numrin e Kombëtareve që nga Botërori 2026, që do të mbahet në Amerikën e Veriut (Shtetet e Bashkuara të Amerikës, Kanada dhe Meksikë).
Me këtë rast, vendimi eventual mund ta rritë nga 64 në 104 numrin e ndeshjeve, ndërsa deri tash ishte planifikuar që në Kupën e ardhshme të Botës të luhen 80 ndeshje.
Në mbledhjen e këshillit drejtues të trupës qeverisëse të futbollit botëror, që po mbahet në Kigali, Rwanda, mund të vendoset për këtë ndryshim, i cili mund t’i ofrojë deri në 40 ndeshje më shumë që nga Botërori 2026.
Përpos zgjerimit të formatit, FIFA synon që me këtë rritje t’i fitojë nga 9 deri në 11 miliardë funte nga të hyrat e kësaj gare.
Me 48 Kombëtare pjesëmarrëse mund të formohen 12 grupe me nga katër ekipe.
Dy Kombëtaret e para të secilit grup dhe tetë më të mirat e vendeve të treta do të avancojnë në fazën eliminuese.
Kjo nënkupton se ekipet që do ta arrijnë finalen do të kenë nevojë t’i zhvillojnë tetë ndeshje, e jo shtatë si i zhvilluan finalistët e Katar 2022, Argjentina dhe Franca.
Ky zgjerim i Kupës së Botës mund t’ua rritë gjasat shumë Kombëtareve, përfshirë këtu edhe Kosovës dhe Shqipërisë, për ta realizuar ëndrrën – kualifikimin në Botëror.
Finalja e Botërorit të Amerikës së Veriut do të luhet të dielën e 16 korrikut 2026..
