Vushtrria është rikthyer pas gjashtë viteve në elitën e futbollit të Kosovës, duke u shpallur kampione e Ligës së Parë.
Në një atmosferë të bukur në Gjakovë, para më shumë se 3000 shikuesve, u zhvillua një ndeshje me kthesa në rezultat.
Vushtrria triumfoi me përmbysje 3:1 ndaj Vëllaznimit në Gjakovë.
Për skuadrën gjakovare kjo ishte një goditje e rëndë, pasi mbeti jashtë elitës dhe jashtë barazhit. Një fitore do ta dërgonte Vëllaznimin direkt në Superligë, por humbja ia shuajti ëndrrën për ngjitje.
Vëllaznimi kaloi i pari në epërsi në minutën e 13-të, kur realizoi Dardan Jashari.
Megjithatë, Vushtrria reagoi fuqishëm në pjesën e dytë.
Heroi i fitores ishte Urim Statovci, i cili realizoi dy gola, në minutën e 60-të dhe 77-të nga penalltia. Vetëm katër minuta më vonë, Erjon Krasniqi shënoi për 1:3 dhe vulosi triumfin e madh të mysafirëve.
Vushtrria e mbyll kampionatin në vendin e parë me 75 pikë, e ndjekur nga Feronikeli 74 me 74 pikë, Liria me 71, Dinamo me 71 dhe Vëllaznimi me 70 pikë.