Barcelona dhe Manchester United janë larg marrëveshjes për Marcus Rashford. Sipas raportimeve nga Anglia, klubi katalanas ka paraqitur një ofertë prej rreth 15 milionë eurosh për sulmuesin anglez, por drejtuesit e “Djajve të Kuq” e kanë konsideruar atë “qesharake”.
Sipas “Daily Mail”, Manchester United ka vendosur një çmim prej rreth 30 milionë eurosh për transferimin përfundimtar të Rashford-it dhe nuk ka ndërmend të negociojë për një shumë kaq të ulët.
Qëndrimi i klubit anglez është bërë edhe më i fortë për dy arsye kryesore.
E para lidhet me vlerësimin që United i bën ende lojtarit dhe investimin e madh të bërë ndër vite për të. Arsyeja e dytë është merkatoja e fundit e Barcelonës, pasi katalanasit sapo kanë shpenzuar afro 70 milionë euro për Anthony Gordon, duke e bërë ofertën për Rashford-in edhe më të papranueshme në sytë e drejtuesve anglezë.
Pas huazimit në Katalunjë, Rashford dukej i gatshëm të vazhdonte aventurën me Barcelonën, por situata financiare dhe konkurrenca në repartin ofensiv mund ta komplikojnë seriozisht operacionin.
Me afrimin e Gordon-it, hapësirat për anglezin në sulmin ‘blaugrana’ mund të reduktohen ndjeshëm. Ndërkohë, Manchester United ka planifikuar rikthimin e lojtarit në grumbullimin veror dhe fazën përgatitore, një sinjal i qartë se, në mungesë të një oferte të kënaqshme, Rashford do të rikthehet në “Old Trafford”.