KDI: Kuvendi të mos qëndrojë spektator përballë vështirësive socio-ekonomike të qytetarëve

Kosova

KDI: Kuvendi të mos qëndrojë spektator përballë vështirësive socio-ekonomike të qytetarëve

Më: 10 mars 2022 Në ora: 17:06
KDI

Kosova është duke u ballafaquar me një krizë ekonomike, e cila përgjithësisht e reflekton krizën ekonomike globale.

Kështu thuhet në një komunikatë nga Instituti i Kosovës për Demokraci, ku tutje thuhet se rritja e çmimeve, fillimisht të energjisë e së fundmi të naftës dhe pothuajse të gjitha produkteve esenciale, ka vështirësuar situatën socio-ekonomike të qytetarëve.

“Madje, në disa raste, çmimet janë rritur përtej ndikimit real që kriza ekonomike ka pasur në produkte të caktuara, duke shkaktuar panik te qytetarët. Në një situatë të tillë, përkundër disa propozimeve që janë bërë publike nga aktorë të ndryshëm, përfshirë partitë opozitare, në Kuvendin e Kosovës ende nuk ka pasur debat në nivel politikash, as iniciativa konkrete ligjore lidhur me këtë çështje”, thuhet në komunikatë.

Në këtë periudhë krize për vendin do të duhej të luante një rol proaktiv në përmbushjen e obligimeve kushtetuese që ka, duke shtyrë përpara politika që përmirësojnë gjendjen ekonomike të qytetarëve, pas rritjes enorme të çmimeve, thuhet tutje.

“KDI-ja i bën thirrje Kuvendit të Kosovës që sa më parë të mblidhet për të ofruar zgjidhje konkrete për të adresuar nevojat e qytetarëve dhe për të kontribuar në përmirësimin e situatës aktuale socio-ekonomike”, thuhet tutje në njoftim.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat