Së bashku me Camavinga, Vinicius, Ederson, Courtois e Rodri, ndër më të mirët në fushë mbrëmjen e djeshme në sfidën Real Madrid-Manchester City ishte dhe “arkitekti” i mesfushës së “qytetarëve”, Kevin de Bruyne.
“Fantazisti” belg ishte autori i goli të mrekullueshëm të barazimit për “qytetarët”, goli që u vu re dhe nga legjenda e futbollit francez, Thierry Henry, i cili në komentin e tij pas ndeshjes së Champions League, nuk nguroi as të “lavdëronte” performancën e De Bruyne.
“Nuk mendoj se bëri një lojë të shkëlqyer në përgjithësi, por shënoi një gol të rëndësishëm.
Kjo është arsyeja pse unë them se ai është lojtari më i mirë dhe më i rëndësishëm në këtë ekip.
Mendoj se “vizioni” i Kevin është më i miri që kam parë ndonjëherë.
Asnjëherë nuk e dini se çfarë po mendon, ndonjëherë duket sikur ai është diku tjetër.
Unë mendoj se ai është lojtari më i zgjuar që kam parë ndonjëherë në jetën time, ai është nga një planet tjetër”,- u shpreh Henry pas ndeshjes.
