Shqipëria shumë më e mirë
Kombëtarja e Shqipërisë është rikthyer në Ligën B të Kombeve, pas fitores me rezultat 2:0 ndaj Bjellorusisë, në ndeshjen e zhvilluar në Budapest të Hungarisë.
Kuqezinjve u mjaftonte edhe një barazim për të siguruar vendin e parë, por ata arritën një fitore plotësisht të merituar, falë golave të Rei Manajt dhe Elseid Hysajt.
Manaj ka realizuar deri më tani 15 gola me fanellën e Kombëtares shqiptare.
Ndeshja nisi me një Shqipëri kërkuese.
Në minutën e dytë, Qazim Laçi ishte shumë pranë golit nga afërsia, por mbrojtësi Roman Begunov arriti ta largonte topin nga vija fatale, duke shpëtuar Bjellorusinë.
Bjellorusia – Shqipëria 0:2
Shënues: Manaj (28'), Hysaj (57').
Kartona të verdhë: Mitaj, Daku - Begunov, Barkovskiy, Volkov, Melnichenko.
Bjellorusia: Lapoukhov: Barbovskiy (Melnichenko 62'), Begunov (Gromyko 62'), Ebong, Gomanov, Kontsevoy (Morozov 73'), Lukashov, Pechenin, Selyava (Bocherov 85'), Shumansky (Kovalev 62'), Volkov. Trajner: Viktor Goncharenko.
Shqipëria: Berisha; Ismajli, Gjimshiti, Mitaj, Hysaj, Shehu, Asllani (Fetai 90'), Pilo, Hoxha (Uzuni 74'), Laçi (Hasa 74'), Manaj (Daku 80'). Trajner: Rolando Maran.
Në minutën e 12-të, rrezikuan edhe bjellorusët. Aleksandr Selyava ishte pranë golit të epërsisë. Pas një aksioni, në të cilin një futbollist bjellorus luajti me dorë, gjyqtari nuk e vërejti ndërhyrjen, ndërsa goditja e Selyavës përfundoi në shtyllën e majtë të portës. Në këtë rast reagoi mirë edhe portieri Etrit Berisha, duke shpëtuar kuqezinjtë.
Në minutën e 17-të, Kristjan Asllani lëshoi një goditje mjeshtërore nga rreth 17 metra, por kur të gjithë menduan se topi do të përfundonte në rrjetë, traversa shpëtoi bjellorusët nga pësimi i golit.
Goli i shumëkërkuar erdhi në minutën e 28-të. Pas një gabimi në mbrojtjen e Bjellorusisë, përfitoi Rei Manaj, i cili me dinakërinë e tij goditi fuqishëm nga rreth 16 metra, duke e dërguar topin në këndin e djathtë të poshtëm të portës për rezultatin 0:1.
Në minutën e 41-të, Shumanski depërtoi nga krahu i majtë drejt qendrës dhe goditi me të djathtën, por topi përfundoi rrezikshëm jashtë, pranë shtyllës së largët.
Ndërsa në minutën e 44-t, Arbër Hoxha shpërdoroi një mundësi të mirë pas asistimit të marrë nga Pilo. Goditja e tij përfundoi ngjitur me shtyllën.
Pjesa e dytë ishte po ashtu dinamike, me Bjellorusinë që kërkonte golin e barazimit, ndërsa Shqipëria synonte ta thellonte epërsinë.
Në minutën e 57-të erdhi edhe goli i dytë. Elseid Hysaj goditi bukur drejt portës, topi u devijua nga Gomanov dhe përfundoi në këndin e majtë të portës për rezultatin 0:2.
Deri në fund, rezultati nuk ndryshoi dhe Shqipëria festoi një fitore të rëndësishme, duke siguruar rikthimin në Ligën B të Ligës së Kombeve.
Me këtë triumf, Shqipëria e përfundoi garën në vendin e parë me 15 pikë, duke lënë pas Finlandën dhe Bjellorusinë me nga 10 pikë, ndërsa San Marino e mbylli grupin pa pikë.