Dy muaj pa ministër të Shëndetësisë, opozita e quan neglizhencë të Qeverisë

Kosova

Dy muaj pa ministër të Shëndetësisë, opozita e quan neglizhencë të Qeverisë

Më: 8 dhjetor 2022 Në ora: 11:35
Foto ilustrim

Ministria e Shëndetësisë ka mbetur pa ministër që nga muaji tetor. Opozita dhe shoqëria civile ka kritikuar qeverinë në lidhje me sektorin e shëndetësisë duke thënë se gjendja në shëndetësi është alarmante. Sipas tyre, qeveria duhet të marrë masa të menjëhershme për këtë sektor.

Ministria e Shëndetësisë  tash e dy muaj ka mbetur pa udhëheqës. Deputeti i Lidhjes Demokratike të Kosovës, Armend Zemaj, për Radio Kosovën ka fajësuar qeverinë për degradim në sektor të shëndetësisë. Sipas tij, qeveria aktuale ka mungesë të programit dhe nuk i ka të përcaktuar prioritetet për shëndetësi.

Qeveria nuk e ka prioritet as nuk e ka pasur  nga fillimi i saj shëndetësinë. Problemet janë rritur, ka kaos institucional ne kuptimin e llogaridhënës, dhe ky është treguesi dhe fytyra e vërtetë e kësaj qeverie”, thotë Zemaj.

Për sa i përket sektorit të shëndetësisë  rezultatet janë skandaloze dhe fatkeqësisht po pësojnë pacientët dhe qytetarët e Republikës së Kosovës”.

Që është situatë e rëndë në sektorin e shëndetësisë, e pranon edhe profesori universitar dhe  njëherësh deputeti i Aleancës për Ardhmërinë e Kosovës, Shemsedin Dreshaj. Sipas tij, mos emërimi i ministrit të shëndetësisë, është shpërfillje e qeverisë ndaj programit të saj qeverisës.

“Vërtetë situata në shëndetësi është shumë e rëndë, është aq e rëndë sa që asnjëherë s’ka qenë kaq keq”, thotë Dreshaj për Radio Kosovën.

“Në situatë të tillë mungesa e ministrit vërtet është neglizhencë dhe mospërfillje të premtimeve që i ka dhënë koalicioni qeverisës që është në pushtet lidhur me përmirësimin e gjendjes në shëndetësi”.

Nga Instituti Demokratik i Kosovës, Diana Metushi thotë se asnjë herë sektori i shëndetësisë nuk ka pasur përformancë më të  keqe.

Ndërkaq, Radio Kosova ka pyetur Qeverinë e Kosovës se kur pritet të emërojë ministrin apo ministren e ri/re të Shëndetësisë, por deri në momentin e publikimit të këtij artikulli nuk ka marrë ndonjë përgjigje.

Ish ministri i shëndetësisë, Rifat Latifi, kishte dhënë dorëheqje nga kjo pozitë më 6 tetor.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat