Trajneri i Llapit, Tahir Batatina e ka cilësuar futbollistin e tij, Elvir Gashijanin si talentin më të madh në Kosovë.
Duke folur pas barazimit të sotëm të Llapit me Brondbyn në Ligën e Konferencës, Batatina kishte vetëm lëvdata për Gashijanin, raporton KosovaPress.
Madje, Batatina shpreson se ylli i Llapit i ka rënë në sy të trajnerit të Kosovës, Franco Fodas.
“Në eliminim ndikoi ndeshja e parë kur humbën thellë. Gjithsesi më gëzon faktin se Llapi po prodhon talenta dhe sot e patë ju Elvir Gashjanin i cili besoi që ka rënë në sytë e selektorit. Gashijani është Zhegrova i dytë dhe ai duhet të jetë zëvendësuesi i tij në Kosovë”, tha Batatina.
“Nëse e shohim se cilët talenta janë zbuluar sivjet në futboll, ka qenë Lamine Yamal te Spanja, Arda Guler te Turqia dhe Elvir Gashijani te Kosova”, shtoi më tej trajneri i Llapit.