Kupa e Botës 2026 do t’u imponojë skuadrave një maratonë udhëtimesh gjatë fazës së grupeve.
Në edicionin e parë me 48 përfaqësuese, që do të zhvillohet në 16 qytete të SHBA-së, Kanadasë dhe Meksikës, disa ekipe do të përshkojnë distanca deri në dhjetë herë më të mëdha se rivalët e tyre, një faktor që mund të ndikojë në përgatitjen fizike dhe rikuperimin e lojtarëve.
Brazili renditet në mes të klasifikimit të skuadrave për sa i përket distancave të udhëtimit.
“Seleçao” do të përshkojë 1761 kilometra gjatë fazës së grupeve, më pak se Anglia, Spanja, Gjermania, Kolumbia dhe Uruguai, por më shumë se Argjentina, Franca, Portugalia, Holanda dhe Meksika. Botërori i vitit 2026 ndryshon ndjeshëm nga ai i Katarit në vitin 2022, ku të gjitha stadiumet ishin shumë pranë njëri-tjetrit dhe mund të arriheshin me makinë.
FIFA ka tentuar të minimizojë lodhjen duke organizuar ndeshjet në grupe qytetesh të afërta, por sërish do të ketë udhëtime të gjata mes brigjeve të Paqësorit dhe Atlantikut.
Mesatarja e distancës që do të përshkojnë skuadrat është 8281 kilometra. Për krahasim, Botërori i Brazilit në 2014 kishte mesatare 11352 kilometra, ndërsa ai i Rusisë në 2018 arrinte në 8756 kilometra. Mes vendeve organizatore, Meksika do të ketë kalendarin më të lehtë, me vetëm 933 kilometra udhëtim dhe dy fluturime.
Kanadaja do të bëjë vetëm një fluturim në fazën e grupeve, ndërsa SHBA-ja do të udhëtojë dy herë përgjatë Bregut Perëndimor. Nga favoritët, Anglia do të jetë skuadra që do të udhëtojë më shumë, me ndeshje pranë Dallasit, Bostonit dhe Nju Jorkut. Spanja renditet menjëherë pas saj. Ndërkohë, Argjentina, kampione në fuqi e botës, do të ketë një nga itineraret më të lehta, me vetëm 742 kilometra mes Dallasit dhe Kansas Sitit.
Renditja e skuadrave sipas distancës së përshkuar në fazën e grupeve kryesohet nga Bosnja dhe Hercegovina me 5059 kilometra, ndërsa Egjipti është skuadra që do të udhëtojë më pak, vetëm 385 kilometra.
