Japonia zyrtarizon kandidaturën e Kozo Tashimës për president të FIFA-s

Futboll

Japonia zyrtarizon kandidaturën e Kozo Tashimës për president të FIFA-s

Nga: B.S Më: 18 nëntor 2026 Në ora: 16:12
Federata Japoneze e Futbollit (JFA) ka dorëzuar zyrtarisht kandidaturën Kozo Tashima

Federata Japoneze e Futbollit (JFA) ka dorëzuar zyrtarisht kandidaturën Kozo Tashima për postin e presidentit të FIFA-s, njoftoi të mërkurën institucioni japonez.

JFA bëri të ditur se të martën i kishte dërguar një letër FIFA-s, pasi bordi drejtues kishte miratuar unanimisht kandidaturën e Tashimës në mbledhjen e 5 nëntorit.

68-vjeçari, i cili ishte president i Federatës Japoneze të Futbollit nga viti 2016 deri në vitin 2024, ka siguruar mbështetjen e pesë federatave kombëtare, duke përmbushur kështu kërkesën minimale për të hyrë në garën zgjedhore.

Tani FIFA do të shqyrtojë nëse Tashima dhe kandidatët e tjerë i plotësojnë kriteret përpara se të publikojë zyrtarisht listën e kandidatëve të miratuar.

Tashima falënderoi presidentin e JFA-së, Tsuneyasu Miyamoto, bordin drejtues të federatës dhe federatat kombëtare që mbështetën kandidaturën e tij.

Ai deklaroi se zhvillimi i futbollit japonez dhe rritja e reputacionit të tij në arenën ndërkombëtare kanë ndikuar në mbështetjen që ka marrë kandidatura e tij.

Premton më shumë transparencë në FIFA

Tashima premtoi se do të angazhohet për forcimin e qeverisjes dhe transparencës në FIFA, duke u mbështetur në përvojën e Japonisë në administrimin e futbollit.

“Dëshiroj ta shfrytëzoj këtë përvojë për të promovuar qeverisje më të fortë dhe menaxhim më transparent organizativ në FIFA”, deklaroi ai.

Zgjedhjet mbahen në mars të vitit 2027

Zgjedhjet për president të FIFA-s janë caktuar për 18 mars 2027, në Kongresin e 77-të të FIFA-s, i cili do të mbahet në Rabat të Marokut.

Përfaqësuesit e 211 federatave anëtare do të votojnë për zgjedhjen e presidentit të ri të institucionit më të lartë të futbollit botëror.

Tashima synon të sfidojë presidentin aktual Gianni Infantino, i cili e drejton FIFA-n që nga viti 2016.
Në mesin e kandidatëve të tjerë të deklaruar janë edhe presidenti i Federatës Franceze të Futbollit, Philippe Diallo, si dhe ish-kapiteni i kombëtares së Zvicrës, Ramon Vega.

Sot mund të lexoni Shfletoni kopertinat