Ferizaj si qytet po ballafaqohet me një situatë të pazakontë, nuk ka stadium të futbollit!
Është shqetësues ky fakt, për një qytet, sidomos klubi i futbollit Ferizaj nuk ka ku t’i zhvillojë ndeshjet!
Në debatin me qytetarë mori pjesë edhe kryetari i komunës së Ferizajt, Agim Aliu, pastaj Lulzim Abazi, Arbnor Morina, Agron Selmani dhe figura të ndryshme.
Hamdi Qerimi dhe shumë ferizajas tjerë, duan që stadiumi të ndërtohet prapa palestrës së sportit “Bill Clinton”.
“Stadiumi i ri i futbollit të Ferizajt duhet të ndërtohet prapa Palestrës së Sporteve “Bill Clinton”.
Kjo ishte kërkesa njëzëri e veteranëve të futbollit, futbollistëve aktiv, trajnerëve, drejtuesve, përfaqësuesve të klubeve futbollistike, dashamirëve të sportit, me të cilët bashkëbiseduam sot, në debatin publik për lokacionin e Stadiumit të Ri të Qytetit, pas shkresës së Ministrisë së Kulturës, Rinisë dhe Sportit, që të zgjedhet një lokacion alternativ dhe jo ai prapa Palestrës “Bill Clinton”, për shkak se ajo pronë, aktualisht është nën menaxhimin e AKP-së.
Ne, udhëheqja politike e Komunës së Ferizajt, do t’i qëndrojmë besnik deri në momentin e nisjes së punimeve, idesë e ëndrrës së gjeneratave të shumta të plejadës së futbollit ferizajas, që ky Stadium të ndërtohet në qytet, pra një stadium i qytetit në qytet e jo në fshatra, ashtu siç meriton futbolli ferizajas, një Stadium dinjitoz, me infrastrukturë e kushte të përshtatshme, lehtë të qasshme për të gjithë qytetarët, e për këtë hapësira më e përshtatshme është ajo e vetmja pronë publike me këto kushte, prapa Palestrës së Sporteve “Bill Clinton” në Ferizaj”, shkruan në faqen e komunës së Ferizajt.
Zëri i ferizajasve dhe gjithë atyre që lanë gjurmë me djersën e tyre në futbollin ferizajas, nuk mund të heshtet, as të orientohet ndryshe.
Aliu, ka falënderuar të gjithë pjesëmarrësit, përderisa ka shtuar se qëllimi kryesor i takimit është diskutimi mbi lokacionin ku do të ndërtohet Stadiumit i ri në qytetin e Ferizajt. Sipas Aliut, të gjitha përpjekjet e Komunës së Ferizajt janë që ndërtimi i stadiumit të ri të qytetit të bëhet tek Kompleksi Sportiv, përkatësisht prapa Palestrës së Sporteve "Bill Clinton".
“Ju e dini që ne kemi bërë punë, angazhime, përpjekje që të bëhet stadiumi, për faktin që Ferizaj si qytet, e ka merituar dhe e meriton ta ketë një stadium të dinjitetshëm, si një ndër qytetet kontributdhënëse në gjithë historinë dhe në të gjitha rrafshet në rang të Republikës së Kosovës. Meritore janë të gjitha këto gjenerata që sot janë këtu, e që janë pjesë që ne kemi bërë punë dhe angazhim.
Sipas planifikimeve dhe sipas Planit Zhvillimor Komunal, stadiumi i qytetit “Ismet Shabani”, duhet të ndërtohet në Kompleksin Sportiv në zonën sportive, që të gjithë ju e dini ku është, dhe ne siç thashë kemi bërë punët dhe përpjekje që atë zonë ne e kemi shpallur edhe në interes të përgjithshëm në mënyrë që të hapet hapësirë ligjore dhe mundësi për ndërtimin e stadiumit, sepse ajo pronë ka qenë në menaxhimin e AKP-së”, ka thënë Aliu.
Ai, ka thënë se është bërë kohë e gjatë, që është kodi buxhetor për ndërtimin e stadiumit, është bërë plani për ndërtimin e tij, si dhe është bërë edhe ndarja e mjeteve financiare për ndërtim.
“Mirëpo, përkundër faktit që është bërë kjo, përkundër faktit që është bërë kodi buxhetor që disa vite, siç është fakt i ditur ajo nuk ka ndodhur dhe arsyet janë që nuk është lejuar krejt bartja në procedurën finale në Qeveri të Republikës së Kosovës, në pronësi të Komunës për t’u mundësuar procedurat e prokurimit për ndërtimin e stadiumit të qytetit.
Përtej kësaj ju e dini që është një vendim shumë i vonë tash, që edhe ato prona që ne i kemi shpallur në interes të përgjithshëm, pikërisht në këtë sallë, Qeveria e Kosovës me vendimin e disa jave të gjitha këto prona i ka marrë në pronësi të saj”, tha Aliu.
Aliu, të gjithë të pranishmit i ka njoftuar që Komuna e Ferizajt, i ka bërë shkresë zyrtare edhe Ministrisë së Kulturës, Rinisë dhe Sportit që të fillojë procedura të reja në mënyrë që të fillojë ndërtimi stadiumit të qytetit, por që sipas tij, përgjigja ka qenë që të gjendet lokacion tjetër për ndërtim.
“Në letrën e kthyer nga Ministria e Kulturës, Rinisë dhe Sportit është kërkuar që ne duhet të kërkojmë një pronë alternative, pra jo aty ku ne po dëshirojmë, dhe normalisht kjo është e padrejtë, sepse siç thash ekzistojnë të gjitha mundësitë ligjore që pronat e AKP-së me bashkërendim, në bashkëpunim me nivelin lokal dhe qendror të kthehet në pronësi komunale. Komuna e Ferizajt është e gatshme, ne jemi të gatshëm të marrim të gjitha obligimet financiare të shpalljes së interesit të përgjithshëm ashtu siç e kemi marr më parë, edhe sot zotohemi para jush që kosto prej 20 përqind që është duke u paguar, apo çfarëdo kosto tjetër të pronës që duhet paguar, Komuna e Ferizajt në mënyrë që ajo të kthehet në pronësi komunale dhe të zhbllokohet ky proces për të ndërtimin e stadiumit të qytetit “Ismet Shabani” në Kompleksin Sportiv ne jemi të gatshëm ta bëjmë. Prandaj duke pasur këtë gatishmëri, ne kemi kërku dhe po kërkojmë që edhe Ministria e Kulturës, Rinisë dhe Sportit të ketë këtë gatishmëri”, ka potencuar Kryetari Aliu.
Aliu, ne këtë takim edhe një herë ka përsëritur qëndrimin e tij, dhe të të gjitha klubeve sportive se stadiumi i qytetit duhet të ndërtohet vetëm tek Kompleksi Sportiv në Ferizaj.
Ndërkaq klubet sportive, por edhe veteranët të sportit, janë shprehur se ndërtimi stadiumit, duhet të bëhet tek Kompleksi Sportiv., për shkak të asaj se mundësitë janë më të mira për zhvillimin e ndeshjeve të tyre sportive.
Hamdi Qerimi, ish Kryetar i Komunës dhe ish-anëtar kryesie i klubit të futbollit, ka thënë se kjo çështje as nuk duhet të diskutohet, sepse sipas tij ndërtimi stadiumit qysh në vitet e mëhershme është paraparë që të ndërtohet tek ai kompleks.
