Serbët nuk kanë pranuar të flasin rreth shfaqjes së flamurit skandaloz në dhomën e tyre të zhveshjes nga ndeshja Brazil – Serbi, që u zhvillua të enjten mbrëma.
Në dhomën e Përfaqësueses së Serbisë u shfaq një flamur me ngjyrat e këtij shteti, si dhe hartën e Republikës së Kosovës në të.
Në këtë flamur ishte një mbishkrim ku thuhej “Nuk ka dorëzim”. Flamuri i njëjtë u shfaq edhe nga tifozët.
FIFA njoftoi këtë të shtunë se ka nisur tashmë hetimet, duke hapur procedurë disiplinore për Federatën e Futbollit të Serbisë.
Gjatë ditës të sotme Marko Grujiq u paraqit në një konferencë për media, aty ku nuk shpëtoi pa u pyetur rreth rastit në fjalë.
Neil Barker, gazetari nga “Associated Press”, u interesua për rastin në fjalë, teksa provoi të merrte një koment nga Grujic. “Pse lojtarët zgjodhën ta vendosin atë flamur në dhomën e zhveshjes”, ishte pyetja e Barker.
Megjithatë, zyrtari për media nga Federata serbe, Milan Vukoviq, reagoi menjëherë duke mos lejuar që mesfushori i Portos të përgjigjej.
Vukoviq tha para gazetarëve se “do të diskutohet vetëm për duelin me Kamerunin”.
