Luka Modriç zhvilloi ndaj Lazios paraqitjen e tij më të dobët që prej transferimit te Milani, ndërsa problemet e shfaqura nga mesfushori kroat duket se lidhen kryesisht me mënyrën se si skuadra po luan taktikisht.
Aktivizimi i Yunus Musah në vend të Modric ishte një nga ndryshimet që ndihmoi Milanin të reagonte dhe të rikthehej deri në barazimin 2-2 ndaj Lazios.
Mund të duket befasuese duke pasur parasysh se bëhet fjalë për një prej mesfushorëve më të mëdhenj të brezit të tij, por edhe lojtarët më të mëdhenj mund të kenë një mbrëmje të dobët.
Në rastin e Luka Modriç, presingu agresiv i organizuar nga Gennaro Gattuso, i kombinuar me mungesën e lëvizshmërisë nga mesfushorët ofensivë dhe anësorët e Milanit në pjesën e parë, ia vështirësuan ndjeshëm lojën.
Ishte e pazakontë të shihje Modric të gabonte pesë herë radhazi gjatë ndërtimit të aksioneve.
Kroati e përfundoi ndeshjen me vetëm 50 për qind saktësi në pasimet e gjata, 38 për qind në pasimet progresive, ku realizoi me sukses vetëm tri nga tetë tentativa, si dhe 40 për qind saktësi në pasimet drejt zonës.
Trajneri Ruben Amorim e pranoi se Milani duhet të krijojë kushte më të përshtatshme që Luka Modriç të shfaqë cilësitë e tij.
“Duhet të jemi shumë të mirë me topin që Luka të ndihet rehat në lojë.
Nëse ndeshjen e kthejmë në tranzicione të vazhdueshme, vrapime dhe situata kaotike, atëherë kjo nuk është loja e duhur për të”, tha Amorim.
“Për këtë arsye ndryshuam në pjesën e dytë dhe aktivizuam Musah. E kuptuam se kishim nevojë për më shumë shpejtësi në mesfushë.”
Trajneri portugez evidentoi edhe një tjetër problem në pozicionimin e 41-vjeçarit.
“Mendoj se Luka po zbriste shumë thellë dhe po afrohej tepër me qendërmbrojtësit.
Në këtë mënyrë kishim katër lojtarë vetëm për ta nisur aksionin dhe shumë më pak futbollistë mes linjave”, shpjegoi ai.
Sipas Amorim, Luka Modriç mund të vazhdojë të jetë një lojtar shumë i rëndësishëm, por Milani duhet të krijojë një lloj ndeshjeje që favorizon kontrollin dhe posedimin.
“Mund të luajmë me Lukën dhe këtë e kemi treguar në ndeshjet e fundit. Por duhet ta kthejmë ndeshjen në një lojë kontrolli dhe posedimi. Nëse bëhet një ndeshje vrapimi, atëherë bëhet pothuajse e pamundur për të”, shtoi trajneri.
Në këtë fazë të sezonit, dinamizmi i Musah dhe aftësia e tij për t’i kthyer shpejt tranzicionet në aksione sulmuese janë shumë të rëndësishme për Amorim.
Milani ende nuk duket mjaftueshëm i përgatitur fizikisht dhe mendërisht për të luajtur futboll dominues gjatë gjithë ndeshjes.
Pikërisht për këtë arsye, trajneri portugez duhet të gjejë një rol të përshtatur posaçërisht për kroatin.
Në moshën 41-vjeçare, nga një ish-fitues i “Topit të Artë” nuk mund të kërkohen të njëjtat ritme dhe kilometra si nga një mesfushor shumë më i ri.
Kroati mund të jetë vendimtar ndaj kundërshtarëve të caktuar
Amorim pritet ta zgjedhë përdorimin e kroatit në varësi të karakteristikave të kundërshtarit.
Kroati mund të jetë veçanërisht i vlefshëm ndaj skuadrave që mbrohen në bllok të ulët, ku ka kohë dhe hapësirë për të kontrolluar ritmin dhe për të gjetur pasime vendimtare.
Situata bëhet shumë më e vështirë ndaj skuadrave si Lazio, që ushtrojnë presing të lartë ndaj lojtarit me top dhe kërkojnë duele një kundër një në të gjithë fushën.
Për Milanin, sfida tani është të gjejë një ekuilibër që i lejon kroatit të vazhdojë të shfaqë magjinë e tij, pa e ekspozuar në ndeshje ku ritmi dhe intensiteti i lartë mund ta kufizojnë.
Një lojtar me madhështinë dhe përvojën e tij meriton një rol të ndërtuar rreth cilësive që ende mund të bëjnë diferencën.
