Ish-anësori i Manchester Unitedit, Ryan Giggs, beson se mesfushori i ri Kobbie Mainoo i ka të gjitha atributet e nevojshme për të arritur nivelin e jashtëzakonshëm të Paul Scholes.
Giggs e lavdëroi Mainoon pas paraqitjes së tij mbresëlënëse në derbin e Manchesterit, duke theksuar përshpejtimin unik, forcën fizike dhe dëshirën e vazhdueshme të të riut për të bërë gjërat e duhura në fushë.
Mainoo e nisi ndeshjen dhe luajti të gjitha 90 minutat, teksa Manchester Unitedi pësoi humbje 1-0 ndaj Manchester Cityt me 10 lojtarë në “Old Trafford” të dielën.
Pavarësisht rezultatit negativ, Giggs mbeti jashtëzakonisht i impresionuar nga qëndrueshmëria e mesfushorit.
Duke folur në kanalin e Rio Ferdinandit në YouTube, Giggs analizoi paraqitjen dhe lavdëroi karakteristikat specifike fizike të të riut.
“Nuk është shpejtësia, është përshpejtimi”, vuri në dukje Giggs.
“Pra, ai nuk është super i shpejtë, por e ka atë përshpejtim dhe është, e dini, fizikisht i fortë. Ai është një lojtar shumë, shumë i mirë”, shtoi ai.
Giggs e krahasoi në mënyrë specifike vizionin e Mainoos me atë të Scholes, duke sugjeruar se ai mund ta zhvillojë atë gamë elitare të pasimeve.
Kur u pyet nëse mesfushori mund të arrijë nivelin e Scholes në aspektin e vizionit, Giggs u përgjigj pozitivisht.
“Po, dua të them, kjo duhet të jetë pasimi i parë që një mesfushor e kërkon në të vërtetë, e dini, një top pas mbrojtjes, potencialisht një pasim prej 30 metrash nga njëra anë në tjetrën”, shpjegoi ai.
“Ai top përpara duhet të jetë pasimi i parë për të cilin mendon. Pra, nëse e shton atë në lojën e tij, krahas driblimit dhe pasimeve të shkurtra, atëherë kush e di?”, shtoi ai.
Ish-anësori uellsian shprehu gjithashtu keqardhje për natyrën rraskapitëse të betejës në mesfushë kundër rivalëve lokalë, duke vënë në dukje se Mainoo vazhdimisht e shtynte veten.
“Më erdhi keq për të në 10 minutat e fundit, sepse ai ende po përpiqej të bënte [shumë gjëra]. Ia morën topin sepse ai ende po përpiqej të bënte gjënë e duhur dhe thjesht nuk kishte energji për ta bërë”, vërejti Giggs.
Ai shtoi: “Si… mesfushor qendre i Manchester Unitedit, ai është ende i ri, ende po e mëson lojën dhe po detyrohet ta mësojë atë duke luajtur”.
