Michael Carrick pritet të vazhdojë të jetë trajner i Manchester Unitedit për ndeshjen e radhës ndaj Bournemouthit, pavarësisht rezultateve të dobëta dhe raportimeve se drejtuesit e klubit po shqyrtojnë mundësinë e shkarkimit të tij.
Sipas Flashscore, Unitedi po kalon një seri prej shtatë ndeshjesh pa fitore në të gjitha garat, ndërsa humbja 4:1 nga Como në Ligën e Kampionëve e ka thelluar edhe më shumë krizën e skuadrës angleze.
Megjithatë, Carrick pritet të jetë në stol edhe në përballjen me Bournemouthin.
Konferenca e tij për media është planifikuar të mbahet të premten, më 23 tetor, ndërsa sipas BBC Sport, drejtuesit e klubit janë të shqetësuar si për rezultatet, ashtu edhe për paraqitjet e ekipit.
Ndër emrat që janë përmendur si kandidatë të mundshëm për ta zëvendësuar Carrickun janë trajneri i Brightonit, Fabian Hürzeler, dhe ish-trajneri i Bayern Munichut, Julian Nagelsmann.
Në qendër të kritikave është gjendur edhe kapiteni Bruno Fernandes, pas deklaratave të tij pas humbjes ndaj Comos. Mesfushori portugez tha se pranimi i golave të hershëm ndikon negativisht në mentalitetin e skuadrës.
“Kur pëson gol herët, hyn në ndeshje me një ndjenjë humbjeje. Është e vështirë të dalësh nga kjo gjendje, duke u përpjekur të luash me guxim, të mbash topin dhe të krijosh diçka”, u shpreh Fernandes.
I pyetur për taktikat dhe stilin e lojës së Unitedit, ai ia la përgjegjësinë trajnerit dhe stafit teknik, duke theksuar nevojën për më shumë guxim në lojë.
“Kjo është përgjegjësi e trajnerit dhe stafit që ta vlerësojnë, jo e imja. Ndonjëherë duhet të jesh më i guximshëm nën presion, të rrezikosh me presing të lartë dhe ta vësh kundërshtarin në vështirësi”, deklaroi ai.
Këto komente kanë nxitur reagime, përfshirë atë të ish-mbrojtësit të Liverpoolit, Jamie Carragher, i cili e kritikoi ashpër Fernandesin për qëndrimin e tij si kapiten.
“Ta shohësh duke hapur krahët në shenjë pakënaqësie çdo javë është e turpshme, sidomos kur kritikon trajnerin, duke pasur parasysh paraqitjet e tij këtë sezon”, tha Carragher në CBS Sports.
Ai shtoi se një sjellje e tillë nuk përfaqëson atë që duhet të jetë një kapiten i Manchester Unitedit.
Për momentin, Carrick pritet të ketë edhe një mundësi për ta kthyer situatën në favor të tij.
Ndeshja ndaj Bournemouthit mund të jetë e rëndësishme për të ardhmen e trajnerit, në një periudhë kur presioni mbi klubin dhe skuadrën vazhdon të rritet.