Katër ndeshje interesante sot në Premierligë

Futboll

Katër ndeshje interesante sot në Premierligë

Më: 24 tetor 2026 Në ora: 12:58
Fotoilustrim

Premierliga vazhdon sot me disa përballje interesante, ku vëmendja kryesore është te dueli ndërmjet Aston Villas dhe Manchester Cityt, si dhe te derbi londinez Chelsea-Tottenham.

Manchester City do të ketë një sfidë të vështirë në udhëtim te Aston Villa, në ndeshjen që zhvillohet nga ora 13:30 dhe i takon javës së tetë të kampionatit.

Skuadra e Pep Guardiolës synon të vazhdojë serinë pozitive dhe ta ruajë bilancin pa humbje në Premierligë këtë edicion. City ka fituar të shtatë ndeshjet e zhvilluara deri më tani dhe kryeson tabelën me 21 pikë.

Në anën tjetër, Aston Villa synon t’i shkaktojë humbjen e parë kampionatit skuadrës nga Manchesteri. Vendasit vijnë në këtë përballje pas gjashtë ndeshjeve radhazi pa humbje, ndërsa kanë fituar katër nga gjashtë përballjet e fundit në kampionat kundër Cityt.

Një tjetër përballje zhvillohet nga ora 16:00, kur Coventry City përballet me Fulhamin. Ndërkohë, Arsenali, kampion në fuqi i Anglisë, do të përballet me Evertonin nga ora 16:00.

“Topçinjtë” renditen në pozitën e dytë me 18 pikë dhe synojnë të vazhdojnë garën për kreun e tabelës.

Përballja që pritet të tërheqë vëmendjen është derbi londinez ndërmjet Chelseat dhe Tottenham Hotspurit, që zhvillohet nga ora 18:30.

Chelsea, që renditet në pozitën e katërt me 13 pikë, synon të shfrytëzojë terrenin vendas për të vazhduar garën në pjesën e sipërme të tabelës.

Në anën tjetër, Tottenhami ka grumbulluar gjashtë pikë, pas një fitoreje, tri barazimeve dhe tri humbjeve, dhe kërkon rezultate më të mira për t’u ngjitur në renditje.

Sot mund të lexoni Shfletoni kopertinat