Trepça ’89 e Mitrovicës ka mbetur pa kryetrajner, pasi Granit Dervisholli ka dhënë dorëheqje nga kjo pozitë.
Vendimi i tij vjen pas humbjes së djeshme të papritur me rezultat 2:1 ndaj Kikës së Hogoshtit, në kuadër të javës së 13-të të Ligës së Parë të Kosovës në futboll.
Lajmin e ka bërë të ditur vetë klubi mitrovicas përmes një njoftimi zyrtar.
“KF Trepça ’89 njofton se Granit Dervisholli ka dhënë dorëheqje nga pozita e kryetrajnerit të skuadrës.
Respektojmë vendimin e tij dhe e falënderojmë për punën, përkushtimin dhe angazhimin gjatë kësaj periudhe në krye të ekipit tonë.
Rrugëtimin e përbashkët e përmbyllim me respekt dhe mirënjohje për kontributin e dhënë në shërbim të klubit dhe objektivave tona.
Në emër të drejtuesve, futbollistëve dhe gjithë familjes së KF Trepça ’89, Granitit i urojmë shëndet dhe suksese në vazhdim të karrierës së tij!”, thuhet në njoftimin e klubit.
Trepça ’89 renditet në vendin e pestë me 23 pikë pas 13 javësh kampionat.