Lamine Yamal vazhdon të shkruajë historinë e futbollit evropian. Ylli i ri i Barcelonës ka thyer një tjetër rekord të madh në Ligën e Kampionëve, duke lënë pas sulmuesin francez Kylian Mbappé.
Në fitoren 3:0 të Barcelonës ndaj Aston Villës, të martën mbrëma, më 3 nëntor, Yamal realizoi golin e parë të takimit, duke arritur në kuotën e 14 golave në kompeticionin më prestigjioz evropian për klube.
Me këtë realizim, 19-vjeçari u bë futbollisti që ka shënuar më së shumti gola në historinë e Ligës së Kampionëve para mbushjes së moshës 20-vjeçare.
Rekordi i mëparshëm mbahej nga Kylian Mbappé, i cili kishte realizuar 13 gola gjatë viteve të adoleshencës. Pas tyre renditet Erling Haaland, me 10 gola të shënuar para ditëlindjes së tij të 20-të.
Yamal e arriti këtë rekord në paraqitjen e tij të 37-të në Ligën e Kampionëve. Përveç 14 golave, talenti spanjoll ka regjistruar edhe 13 asistime, duke dëshmuar ndikimin e tij të jashtëzakonshëm në lojën sulmuese të Barcelonës.
Sulmuesi anësor, i cili debutoi në Champions League në moshën 16-vjeçare, ka vendosur tashmë disa rekorde të tjera. Ai është futbollisti më i ri që ka nisur një ndeshje si titullar në këtë garë dhe më i riu që ka shënuar në një gjysmëfinale.
Yamal do të mbushë 20 vjeç më 13 korrik 2027, që do të thotë se ka ende mundësi ta thellojë rekordin e tij gjatë këtij sezoni.
Ndërkohë, Barcelona vazhdoi ecurinë pozitive në Ligën e Kampionëve me fitoren bindëse ndaj Aston Villës, skuadër që deri në këtë përballje kishte bilanc të përsosur në fazën e ligës.
Për Yamal, mbrëmja në Camp Nou nuk solli vetëm tri pikë për Barcelonën, por edhe një vend të veçantë në historinë e futbollit evropian.