Manaj në qendër të vëmendjes edhe për pagesat dhe kërkesën në FIFA

Futboll

Manaj në qendër të vëmendjes edhe për pagesat dhe kërkesën në FIFA

Më: 16 nëntor 2026 Në ora: 23:31
Rei Manaj është bërë protagonisti absolut i Kombëtares shqiptare

Rei Manaj është bërë protagonisti absolut i Kombëtares shqiptare të futbollit në dy vitet e fundit, duke qenë ai njeriu gol i kuqezinjve e shënuar me rregullsi.

Por paralelisht me  Kombëtaren, ai është bërë protagonist absolut edhe me klubin e Sivaspor ku gjithçka varet nga forma e sulmuesit.

Por ndërsa ai ishte në grumbullim me Kombëtaren, në ditët e fundit në Turqi diskutimet për Manajn janë kthyer në një temë kryesore.

Tani flitet për vazhdimin apo jo të sulmuesit në radhët e Sivaspor në kategorinë e dytë. Zërat për një transferimit të mundshëm te Kajzerispor janë shtuar, pasi bëhet e ditur se problemet financiare të klubit aktual mund të bëhen shkak për ndërprerjen e marrëveshjes mes palëve.

Sivaspor ka rroga të shumta të prapambetura të papaguara ndaj lojtarëve dhe bëhet e ditur se edhe Manaj është mes tyre. Në mediat turke qarkulloi lajmi se ai i është drejtuar FIFA-s duke kërkuar pagesën e këtyre detyrimeve. Por sipas gazetarit turk Mustafa Atesh, këto lajme nuk kanë qenë të vërteta dhe shpjegimet i kishin ardhur nga stafi i Manajt.

“Kontrata jonë me Sivaspor vazhdon. Nuk jemi në diskutime me asnjë klub, siç është përmendur në rrjetet sociale. Nuk kemi bërë asnjë ankimim në FIFA në lidhje me klubin e Sivaspor dhe pagesat e prapambetura. Këto janë çështje që do të diskutohen me drejtuesit e klubit.

Bashkëbiseduesi ynë është gjithmonë klubi i Sivaspor”, theksonin burimet pranë lojtarit për situatën në fjalë që ka krijuar shumë kaos në mediat turke.

Sot mund të lexoni Shfletoni kopertinat