Në gjashtë vjetorin e anëtarësimit të Komitetit Olimpik të Kosovës në Komitetin Olimpik Ndërkombëtar, Presidenti i KOK-ut, Besim Hasani ka pritur në takim kryeministrin e Kosovës Avdullah Hoti dhe Ministren për Kulturë, Rini e Sport, Vlora Dumoshi.
Në këtë takim kryeministri Hoti dhe ministrja Dumoshi nënshkruan një Memorandum Bashkëpunimi me presidentin e KOK-ut, Besim Hasani.
Me këtë rast Hasani ka falënderuar Kryeministrin Avdullah Hoti dhe ministren Dumoshi për vizitën e tyre, ndërkohë ka paraqitur para tyre kërkesat dhe nevojat e kësaj organizate. Ai ka bërë thirrje që organizata që ai drejton të mbështetet në ndërtimin e infrastrukturës sportive.
Hasani: Kemi nevojë për mbështetje ne infrastrukturën sportive
“Infrastruktura sportive, kemi nevojë edhe më tej për mbështetjen përkundër që me hapa gjigant është duke përparuar por kemi nevojë të themi në dy ciklet e ardhshme olimpike të bëhet një zgjidhje. Ne i dimë edhe vështirësitë edhe sfidat por edhe vullnetin që sportit t’i dilet në ndihmë duke qenë segmenti që ndoshta më së shumti ndikon në imazhin e Republikës së Kosovës.... Sa i përket KOK-ut, po e shihni ku punojmë, nuk duam të ankohemi por vërtetë në raport me objektivat e larta strategjike që i kemi, kemi nevojë për më shumë staf, kemi nevojë prandaj pak më shumë zyre dhe në këtë drejtim nëse do të mund të na ndihmoni diçka do të ishim shumë mirënjohës. “, deklaroi Hasani.
Ndërkohë kryeministri Hoti përgëzoi Komitetin Olimpik të Kosovës për punën që kanë bërë deri më tani dhe premtoi mbështetjen e vazhdueshme të Ministrisë për Kulturë Rini dhe Sport si dhe të Qeverisë së Kosovës.
Hoti: Kjo është ditë e veçantë për Komitetin Olimpik dhe për të gjithë Kosovën
“Besoj që është ditë e veçantë për Komitetin Olimpik të Kosovës, por edhe për Kosovën përgjithësisht. Anëtarësimi juaj mandej i ka hapur rrugë anëtarësimit të federatave përkatëse edhe i ka hapur rrugë që plotë talente që kanë ekzistuar në Kosovë menjëherë të shihen në arenën ndërkombëtare dhe është kënaqësi që flamuri i Kosovës është bërë e mundur që ta valojë nëpër garat ndërkombëtare sepse ka qenë pjesë e ndërtimit të asaj krenarisë të shtetit të ri të Kosovës dhe unë dëshirojë me iu falënderuar për një lidership të jashtëzakonshëm në ndërtimin e Komitetit Olimpik të Kosovës.... Unë jam i nderuar që jam prezent në ceremoninë e këtij nënshkrimi dhe me shumë vëmendje i dëgjova informatat për punën që keni bërë deri më tash. Do të punojmë bashkë, do ta keni mbështetjen në mënyrë të pa diskutueshme.”, tha Hoti.
Ndërkaq Dumoshi tha se është kënaqësi e veçantë që bashkë me kryeministrin Hoti të marrin pjesë në shënimin e gjashtë vjetorit të anëtarësimit të Komitetit Olimpik të Kosovës në Komitetin Olimpik Ndërkombëtar.
Dumoshi: Kënaqësi e veçantë të jemi këtu në shënimin e këtij përvjetori
“Për jua është kënaqësi e veçantë sot bashkërisht me Kryeministrin me shënuar gjashtëvjetorin e KOK-ut e cila është bërë pjesë e ndërkombëtares e cila ka hapur dyert për krejt organizatat tjera ku sot i kemi diku 87 dhe çdo ditë janë duke avancuar. Por gjithashtu ju falënderoj për përpjekjen e juaj, për këmbëngulësinë që ne me qenë pjesë e pjesës ndërkombëtare duke pasur sportistë të shkëlqyeshëm për me qenë prezent dhe faktikisht krejt mundi u kurorëzua me Majlindën në Olimpiadë e cila na e solli çmimin më të lartë dhe na bënë krenar çdo ditë.”, theksoi në fund Dumoshi.
