Ish-kampioni i MMA-së, Ben Askren, habit botën sportive.
Ai ka folur nga shtrati i tij në spital pasi iu nënshtrua një transplanti të dyfishtë të mushkërive.
“Në një rrëfim emocional, ai zbuloi detajet tronditëse të luftës së tij për jetë, e cila zgjati më shumë se një muaj dhe e la pa kujtime të momenteve më kritike”, transmeton mediumi kroat “Veçernj List”.
Nga shtrati i tij në spital, dukshëm më i dobët por me një buzëqeshje të dallueshme, ai ndau me publikun detajet tmerruese.
"Vdiqa katër herë, zemra ime ndaloi për rreth njëzet sekonda.
Kjo nuk është gjë e mirë, shpresoj ta dini këtë ", tha Askren, duke shtuar se nuk mban mend pothuajse asgjë nga periudha 28 maji deri më 2 korrik.
Ai e mësoi historinë e plotë vetëm pasi lexoi një ditar të mbajtur nga gruaja e tij Amy. Shënimet e saj, siç thotë ai, lexohen "si një skenar filmi".
Drama filloi kur Askren u shtrua në spital në Wisconsin për pneumoni të rëndë që u zhvillua nga një infeksion stafilokoksik. Gjendja e tij u përkeqësua shpejt, duke bërë që ai të vendoset në komë të induktuar.
Gruaja e tij, Amy, njoftoi më 7 qershor se Beni ishte në gjendje kritike dhe po "lutej për një mrekulli". Mjekët i thanë asaj në atë kohë se nëse ai mbijetonte, do të ketë nevojë për një transplant të mushkërive.
Pas javësh pasigurie, transplanti i dyfishtë u krye me sukses më 30 qershor dhe Askren tani është në një rrugë të gjatë drejt shërimit.