Bekaj fantastik në Shqipëri, tregon si e priti penalltinë e ish-sulmuesit të Dritës

Futboll

Bekaj fantastik në Shqipëri, tregon si e priti penalltinë e ish-sulmuesit të Dritës

Më: 11 dhjetor 2020 Në ora: 16:53
Visar Bekaj

Portieri prishtinas, Visar Bekaj është duke u cilësuar si një nga transferimet më të mira të afatit kalimtar për Tiranën.

Bekaj duket se ka fituar vendin e titullarit për “bardhekaltërit” kryeqytetas, teksa ndeshjen e fundit ka pritur edhe një penallti.

Tirana fitoi në udhëtim te Laci me rezultat 0:1, dhe penalltia e pritur nga Bekaj ia solli tre pikë kampionëve në fuqi.

“Gardiani” ka treguar se si arriti ta ndalonte goditjen e sulmuesit të rrezikshëm, Nwabueze.

“Në fakt, e prita deri në fund se çfarë do të bënte sulmuesi. Në momentin e fundit u hodha në krahun e djathtë. Ia kuptova edhe këndin gjuajtjes. Pak a shumë e lexova se çfarë do të bënte Nuabueze dhe më buzëqeshi zgjedhja që bëra, duke pritur penalltinë. Jam i kënaqur, sepse kam bërë diçka të mirë për ekipin. Në fund kam bërë detyrën për Tiranën”, ka thënë Bekaj për “PanoramaSport”.

Momentalisht Visar Bekaj me Tiranën zë vendin e pestë, teksa kanë grumbulluar nëntë pikë pas shtatë takimeve.

comment Për komente lëvizni më poshtë
Sot mund të lexoni Shfletoni kopertinat