Gianluigi Buffon e ka pranuar se rritja e shpejtë e Federico Chiesas në majat e futbollit botëror e ka habitur, si dhe e ka cilësuar sulmuesin e Juventusit dhe të Italisë si vërtetë të veçantë.
Chiesa i vuri kapak një sezoni të mirë debutues me Juventusin duke e frymëzuar Italinë drejt lavdisë në Euro 2020 këtë verë.
Paraqitja e veçuar e 23-vjeçarit erdhi në triumfin e Italisë në finale kundër Anglisë në Wembley, nga e cila Buffoni kishte mbetur gojëhapur nga talenti i tij përsëri, pasi fillimisht kishte pasur dyshim në aftësitë e tij në Torino.
Ish-portieri i Juventusit, i cili u kthye në Parma muajin e kaluar, e ka pranuar se Chiesa nuk e kishte bindur kur i ishte bashkuar bardhezinjve nga Fiorentina në tetor të vitit 2020.
“Kur ai mbërriti në Juve nuk mendoja se ishte aq i mirë. Unë jam i sinqertë. Në Kampionatin Evropian ai ishte i jashtëzakonshëm. Në finale kundër Anglisë ishte e pamundur ta ndalje atë”, tha Buffon për Gazzetta dello Sport.
“Pas një sezoni në Juve me Federicon nuk është më befasi për mua, por nuk ishte e qartë se ai do të ishte në gjendje të luante në një nivel kaq të lartë në një turne siç është Kampionati Evropian. Nëse i bën ato gjëra në një nivel aq të lartë, atëherë do të thotë se je vërtetë i veçantë”, shtoi ai.
