Humbjet ndaj Young Boys në Champions League, West Ham në Kupën e Ligës disfatë që solli edhe eliminimin nga ky kompeticion dhe sëfundmi Aston Villas në Premier League kanë trazuar ujrat në shtëpinë e Manchester United.
Fajtori kryesor për këtë moment jo të skuadrës konsiderohet trajneri Ole Gunnar Solskjaer me norvegjezin që është vendosur në qëndër të kritikave për shkak edhe të zgjedhjeve të gabuara në situata të caktuara të lojës.
Solskjaer i cili është ulur në stolin e Manchester United që nga dhjetori i vitit 2018-të dhe në këto tre vite nuk ka fituar asgjë me “Djajtë e Kuq”, me siguri që nuk do të qëndrojë gjatë në Old Trafford nëse skuadra vazhdon të mos paraqitet mirë në fushë dhe ai nuk arrin të sjellë një trofe në fund të këtij sezoni, i këtij mendimi është ish-sulmuesi i Manchester United Teddy Sheringham i cili ka qenë shok skuadre me Solskjaer te Djajtë e Kuq në periudhën 1997-2001 dhe të dy bashkë ishin heronjtë e asaj përmbysjeje të çmendur ndaj Bayernit në shtesë në finalen e Championsit të vitit 1999 me Sheringham që barazoi shifrat në 1-1 në minutën e 91-të, dhe Solskjaer që realizoi golin e fitores në minutën e 93-të. Në një intervistë Sheringham tashmë 55-vjeçar ka analizuar situatën e Solskjaer te Manchester United.
“Pa dyshim ka presion ndaj Solskjaer këtë vit për të fituar diçka. Ata nënshkruan me Varane dhe Sancho.
Kjo do të ishte e mjaftueshme, por më pas erdhi Ronaldo dhe drejtuesit duhet të shohin rezultate tani.
Ole është ende një menaxher i ri dhe ai po fiton përvojë ndërkohë që është në punë. Në nivele të larta ai njeh vetëm Unitedin dhe kjo është një punë e vështirë për t’u larguar. Unë mendoj se ai po përparon, por duhet ta çojë punë e tij në një nivel tjetër.
Kam idenë se të gjithë duan që ai të bëjë mirë, duan që ai të bëjë mirë sepse ai është një legjendë e Manchester United. Kjo i jep atij një hapësirë, por duhet theksuar se ai duhet të fitojë diçka. Nuk është shkencë e raketave. Nëse nuk ndodh, nuk do të zgjasë shumë aty”, komentoi ish sulmuesi Sheringham, me 55-vjeçarin që me fjalët edhe pse jo në mënyrë të hapur kritikoi ish-shokun e skuadrës Solskjaer.
