Mikel Arteta këmbëngul se ai nuk ka frikë nga një tjetër eksod nga Arsenali si rezultat i pasurisë së re të Newcastle.
Të dy klubet shkojnë ballë për ballë në Premier Ligë të shtunën me “Magpies” tani nën pronësinë e konsorciumit të mbështetur nga Arabia Saudite Amanda Staveley, i cili ka plane ambicioze për të ardhmen.
Megjithatë, Arteta është i bindur se nuk do të përsëriten bastisjet që Manchester City i bëri klubit pas një injeksioni të madh parash nga Abu Dhabi në fillim të këtij shekulli, i cili pa Emmanuel Adebayor, Kolo Toure, Gael Clichy dhe Samir Nasri të bashkohen në klubin e “Citizens” në këmbim të një totali prej 72 milionë funtesh.
I pyetur nëse ishte i shqetësuar, ai u përgjigj: “Jo. Mendoj se lojtarët duhet të qëndrojnë në klubet e futbollit kur ndjejnë se i përkasin diku, kur ndihen të rëndësishëm për të, kur ndihen të vlerësuar në çdo aspekt dhe kur është kështu, normalisht lojtarët duan të qëndrojnë".
“Kur lojtarët fillojnë të vendosin diçka tjetër, është sepse ata kanë nevojë për diçka ndryshe në të ardhmen e tyre, dhe kjo ndodh me çdo klub që ka fuqi financiare për të bindur dikë, ose ka kapacitete të tjera".
“Ndonjëherë nuk është fuqia financiare, ndonjëherë janë arsye sportive, ndonjëherë arsye familjare, ndonjëherë është një problem i përshtatjes. Ka shumë raste të ndryshme”, ka përfunduar spanjolli.
