Thomas Brdariç ka dhënë një tjetër intervistë për mediat gjermane, këtë herë për “Kicker”. Trajneri gjerman ka komentuar këtë sezon me Vllazninë, situatën e shkodranëve dhe njëkohësisht ka folur për vlerësimin që mori si trajneri i vitit nga “RTSH” në bashkëpunim me FSHF, në galan e fundit të vitit. Brdaric është shprehur se ka rikthyer entuziazmin në Shkodër.
“Ne mund të jemi krenarë për atë që kemi arritur në gjysmë të ndeshjeve të kampionatit. Por sigurisht që duam më shumë dhe nuk jemi ende aty ku duam të jemi. Dhe ne duhet të jemi në luftën për trofeun pas triumfit tonë vitin e kaluar. Performanca zakonisht është e mirë. Por ne nuk shënojmë mjaftueshëm gola. Kjo e bën gjithmonë problematik situatën. Sidomos në transfertë, shpesh në terrene me gunga dhe me vendime të arbitrit që hasin polemika. Duhet t’i shfrytëzosh ftohtësisht shanset, por pikërisht këtë e kemi të vështirë.
Kishim kushte në të cilat asnjë klub profesionist evropian nuk mund të përparonte realisht. Ajo që ndodhi tani është në fakt pak më shumë normalitet. Jemi duke u stërvitur në një fushë të re me terren artificial që nga e premtja e kaluar, për të cilën jam po aq i lumtur sa një mbret i borës. Ai mund të mos jetë më i miri për standardet gjermane, por është një hap i jashtëzakonshëm nga fusha në të cilën kemi punuar më parë.
Trajneri i vitit? Para së gjithash, është kryer nga ekspertë të medias. Dhe këta profesionistë nuk kanë parë vetëm titujt e fituar, por edhe historinë që po shkruajmë këtu. Vllaznia është një klub tradicional që prej kohësh është në një gjumë të thellë. Diçka po lind përsëri këtu.
Kur erdha këtu, gjëja e parë që duhej të pyesja veten ishte: a luhet futboll këtu? A është dikush këtu i interesuar për ne? Nuk vihej re asgjë, as në rrugë, as në restorante. Me sukseset kemi zgjuar sërish entuziazmin. Njerëzit po i kthehen futbollit, janë të lumtur dhe mendojnë se mund t’i konkurrojmë sërish klubet e mëdha aktuale në vend”, tha Brdariç.
