Një ditë e veçantë është kjo e sotmja për Vllazninë pasi feston datëlindjen e 103-të.
Shkodranët janë themeluar në 16 shkurt të vitit 1919,duke i dhënë futbollit shqiptar prej vitesh emra të spikatur që do të përfaqësonin shtetin tonë nëpërmjet Kombëtares. 103 vite histori, me 9 tituj kampion, 7 Kupa dhe 2 Superkupa.
Urime të shumta kanë ardhur për Vllazninë, por më i veçanti është ai që ka mbërritur së fundmi. Bëhet fjalë për ekipin që garon në nivelet e ulëta në Angli, Sheffield Football Club.
Por simbolika është e madhe pasi bëhet fjalë për skuadrën më të vjetër në botë që ende luan futboll në bazë të njohjes nga FIFA.
“Në këtë ditë, në 1919 u krijua edhe Vllaznia, ekipi shqiptar më i vjetër. Gëzuar datëlindjen”, shkruhet në shqip urimi nga Sheffield Football Club.
Një gjest shumë i bukur i klubit legjendar anglez dhe aq më tepër që urimi u bë edhe në gjuhën shqipe. Këtu meritojnë respekte.
