“Blutë” e Napolit kanë filluar tashmë të mendojnë për merkatom e verës, ku me shumë mundësi, nga kampionët në fuqi të Italisë do të largohet “bomberi” nigerian, Viktor Osimhen.
“Ylli” i sulmit, protagonist në titullin e 3-të kampion të napoletanëve që prej verës së kaluar është një prej emrave më të lakuar në fraksionet e merkatove, me “gjigantët” e futbollit evropian që janë në ndjekje të 25-vjeçarit e për këtë arsye bordi i Napoli është në kërkim të një zëvendësuesi të denjë për nigerianin.
Deri më tani lista është e pasur, me plot 4 emra në të, ku ndër më favoritët për të nënshkruar me “Blutë” është holandezi i “Emilianëve” të Bolonjas, Xhoshua Zirkzee, i cili ka shkëlqyer në këtë sezon, të Serie A, i cili deri më tani këtë sezon ka shënuar 9 e ka asistuar 4 gola, mes Kupës e kampionatit, në 23 ndeshjet e zhvilluara.
Më tej në listë janë dy “yje” të Bundesliga, Viktor Bonifas e Serhou Zhirasu. Nigeriani i “aspirinave” të Bajer Leverkuzeni është ndër protagonistët absolut te djemtë e teknikut Çabi Alonso, me 16 gola e 8 asiste në 23 përballje gjatë gjithë sezonit, ndërsa “bomberi” i Shtutgartit ka shpërthyer këtë sezon me plot 19 gola e 2 asistme, në 16 paraqitje.
Mes emrave të preferuar nga drejtuesit e 3 herë kampionëve të Italisë është edhe “bomberi” kanadez, Xhonatan David, me 24-vjeçarin e francezëve të Lille, i cili po kalon gjithashtu një sezon të mirë, ku në 27 përballjet e regjistruar deri në këtë pikë të sezoni ka shënuar plot 11 gola për francezët, si dhe ka asistuar 6 të tjerë.
