Fenerbahce humbi 2-1 takimin e parë kundër Lille, i vlefshëm për raundin e tretë të Champions League. Objektivi i klubit nga Stambolli është kualifikimi në fazën e grupeve dhe djemtë e Jose Mourinhos do të bëjnë të pamundurën për ta realizuar.
Edon Zhegrova shënoi golin e fitores për francezët në minutat e fundit, por tjetër histori do të jetë të martën e ardhshme (13 gusht) në stadiumin “Ulker Stadium Sukru Saracoglu”.
“Special One” është optimist për duelin e kthimit. Stilin e futbollit që praktikojnë Zhegrova dhe shokët e tij e vlerëson, ndërkohë që kërkon mbështetjen e publikut turk për të përmbysur disfatën në Francë.
“Nuk i dihet si mund të jetë takimi tjetër, por rezultati do të jetë i ndryshëm. Nuk besoj se Lille do të vijë në Stamboll për t’u mbrojtur. Një gjë e tillë është kundër natyrës së tyre.
Gjithsesi, ne do të kemi në mbështetje 40 mijë tifozë, të cilët do të luajnë një rol të rëndësishëm. Do të shijojmë një ndeshje shumë të bukur.
Lille? Më pëlqen stili i tyre i lojës. Por edhe skuadra ime më pëlqen, përtej gabimeve që bëmë. Mendoj se mund ta përmbysim rezultatin, por si fillim le të fokusohemi të sfida e fundjavës në kampionat”, theksoi Mourinho.
