​Penalltia në minutën e 98-të ndez finalen e Kupës së Afrikës, reagon ashpër Infantino

Futboll

​Penalltia në minutën e 98-të ndez finalen e Kupës së Afrikës, reagon ashpër Infantino

Më: 19 janar 2026 Në ora: 09:15
Gianni Infantino

Presidenti i FIFA-s, Gianni Infantino, ka reaguar ashpër ndaj ngjarjeve të ndodhura në finalen e Kupës së Kombeve të Afrikës mes Marokut dhe Senegalit, duke i cilësuar ato si “skena të papranueshme” në fushë dhe në tribuna.

Reagimi i tij erdhi pas penalltisë së akorduar për Marokun në minutën e 98-të, e cila më pas u humb nga Brahim Diaz, por që shkaktoi protesta të ashpra nga tifozë dhe lojtarë senegalezë.

“Fatkeqësisht, pamë skena të papranueshme në fushë dhe në tribuna. Është e papranueshme të braktisësh fushën e lojës në këtë mënyrë dhe dhuna nuk mund të tolerohet në sportin tonë”, u shpreh Infantino, duke dënuar edhe sjelljen e disa lojtarëve dhe anëtarëve të stafit të Senegalit. Ai theksoi se vendimet e gjyqtarëve duhet të respektohen gjithmonë, pasi çdo veprim në kundërshtim me Ligjet e Lojës “rrezikon vetë thelbin e futbollit”.

Në fund, kreu i FIFA-s nënvizoi rolin e ekipeve dhe lojtarëve si shembull për tifozët dhe miliona shikues në mbarë botën, duke shtuar se “skenat e shëmtuara që pamë sot duhet të dënohen dhe nuk duhet të përsëriten kurrë”, pasi, sipas tij, “ato nuk kanë vend në futboll”.

comment Për komente lëvizni më poshtë
Sot mund të lexoni Shfletoni kopertinat