Sulmuesi i FC Prishtinës, Leotrim Kryeziu, ka shkruar emrin e tij në librat e historisë së klubit bardhekaltër pas golit të realizuar në derbin ndaj FC Ballkanit.
Me këtë gol, "Leo" ka arritur në kuotën e 48 realizimeve me fanellën e Prishtinës, duke u ngjitur në vendin e dytë si golashënuesi më i mirë i klubit në periudhën e pasluftës dhe duke lënë pas legjendën Azem Ahmeti. Para tij në këtë listë tashmë mbetet vetëm Sheremet Jusufi, i cili kryeson me 60 gola.
Përveç golave, Kryeziu ka regjistruar një tjetër arritje të jashtëzakonshme duke kapur shifrën e 228 paraqitjeve zyrtare.
Ky numër ndeshjesh e rendit atë gjithashtu si lojtarin e dytë me më së shumti paraqitje për Prishtinën në epokën e pasluftës, duke dëshmuar besnikërinë dhe kontributin e tij të madh për klubin kryeqytetas.