Nga Italia në Zvicër, mbrëmja e së dielës foli shqip. Edon Zhegrova shënoi dy herë për Juventusin, ndërsa Xherdan Shaqiri udhëhoqi Baselin me dy gola dhe një asistim, duke konfirmuar se vazhdojnë të bëjnë diferencën në nivele të larta të futbollit evropian.
Edon Zhegrova dhe Xherdan Shaqiri ishin protagonistët shqiptarë të mbrëmjes së diel, duke realizuar së bashku katër gola dhe një asistim në Itali dhe Zvicër.
Zhegrova zhvilloi një paraqitje mbresëlënëse për Juventusin në ndeshjen dramatike ndaj Sassuolos. I aktivizuar nga banka rezervë, reprezentuesi i Kosovës shënoi dy herë në minutat e fundit dhe e riktheu skuadrën e tij dy herë në lojë.
Sassuolo kishte kaluar në epërsi në minutën e 65-të, por Zhegrova barazoi në minutën e 82-të. Pasi vendasit realizuan përsëri për 2:1, sulmuesi kosovar u përgjigj me golin e tij të dytë, duke e çuar rezultatin në 2:2.
Megjithatë, mbrëmja e tij e madhe nuk u shpërblye me pikë. Vasilije Adzhiq shënoi në çastet e fundit dhe i dha Sassuolos fitoren 3:2. Pavarësisht humbjes, Zhegrova ishte figura më pozitive e Juventusit dhe dëshmoi se mund ta ndryshojë ndeshjen edhe kur aktivizohet nga stoli. Reuters
Në Zvicër, Xherdan Shaqiri ishte vendimtar në fitoren 4:2 të Baselit në udhëtim ndaj Lucernit.
Kapiteni i Baselit fillimisht asistoi nga goditja e këndit për golin e Philip Oteles, me të cilin mysafirët kaluan në epërsi 2:1 para pushimit. Në pjesën e dytë, Shaqiri realizoi dy herë, në minutat 56 dhe 66, duke e çuar rezultatin në 4:1 dhe duke e vendosur praktikisht ndeshjen.
Baseli e kishte nisur keq takimin, duke pësuar gol pas vetëm rreth 30 sekondash, por reagoi shpejt dhe e përmbysi plotësisht rezultatin. Shaqiri ishte njeriu kryesor i këtij rikthimi, me përfshirje të drejtpërdrejtë në tre nga katër golat e skuadrës së tij.
Dy futbollistët patën përfundime të ndryshme: Shaqiri festoi fitoren, ndërsa Zhegrova mbeti pa pikë. Por paraqitjet e tyre prodhuan të njëjtin mesazh – në një mbrëmje të mbushur me ndeshje të mëdha evropiane, dy nga figurat më të njohura të futbollit shqiptar arritën të merrnin vëmendjen me gola dhe paraqitje individuale të nivelit të lartë.