Arsenali synon të vazhdojë formën e shkëlqyer në stadiumin “Emirates” dhe të mbetet në garë për kreun e Premier League.
Skuadra e Mikel Artetës do të përballet me Evertonin, i cili pësoi humbjen e parë të sezonit fundjavën e kaluar dhe ka një histori aspak të favorshme në transfertat ndaj londinezëve.
Arsenali dhe Evertoni do të përballen në një ndeshje ku të dyja skuadrat kërkojnë rezultat pozitiv, por hyjnë me objektiva dhe statistika të ndryshme.
Londinezët synojnë ta ruajnë ritmin në garën për titull, ndërsa Evertoni kërkon të reagojë pas humbjes kundër Chelseat dhe të përmirësojë rezultatet në transfertë.
Historia e përballjeve direkte dhe forma e Arsenalit në shtëpi e vendosin skuadrën e Artetës në një pozitë të favorshme.
Arsenali vjen në këtë takim pas një përballjeje të fortë në Ligën e Kampionëve, ku barazoi 2-2 kundër Bayern Munichut.
Megjithatë, rezultatet e skuadrës në Premier League vazhdojnë të jenë shumë pozitive.
Londinezët kanë fituar 11 nga 12 ndeshjet e fundit në kampionat, duke regjistruar vetëm një humbje.
Disfata e vetme erdhi muajin e kaluar kundër Brightonit, me rezultat 3-0, dhe ka ndikuar që Arsenali të jetë tri pikë larg kreut të tabelës përpara kësaj jave.
Pavarësisht kësaj, forma në stadiumin “Emirates” i jep Artetës arsye për optimizëm.
Arsenali ka regjistruar tetë fitore radhazi në shtëpi, duke pranuar vetëm dy gola gjatë kësaj periudhe.
Një tjetër statistikë pozitive lidhet me ndeshjet e zhvilluara të shtunave. Londinezët kanë fituar dhjetë nga 11 takimet e fundit të kampionatit që i kanë luajtur në shtëpi në këtë ditë, duke pësuar vetëm një humbje.