Armando Broja ka nënshkruar kontratë të re me Chelsean që e mban atë në “Stamford Bridge” deri në verën e vitit 2026.
Sulmuesi i ri, i cili do të bëhet 20 vjeç në shtator, kaloi sezonin e kaluar në huazim në Eredivisie me Vitessen, ku bëri 34 paraqitje dhe 11 golat e tij ndihmuan ekipin holandez për të përfunduar në vendin e katërt dhe në finalen e Kupës KNVB, në të cilën ata u mundën nga Ajaxi.
Reprezentuesi shqiptar bëri debutimin e tij për skuadrën e parë të Chelseat në mars të vitit 2020, duke u inkuadruar nga pankina në ndeshjen kundër Evrtonit, përcjellë KosovaPress.
Në skenën ndërkombëtare, Broja ka përfaqësuar Shqipërinë që nga grupmoshat nën 16 vjeç dhe bëri debutimin e tij për skuadrën e seniorëve tre ditë para ditëlindjes së tij të 19-të shtatorin e kaluar, në ndeshjen e Ligës së Kombeve kundër Lituanisë. Që nga atëherë Broja ka bërë gjashtë paraqitje për ekipin kombëtar.
Pas nënshkrimit të kontratës së tij të re, Broja tha:
“Unë jam me të vërtetë i ngazëllyer që po nënshkruaj një kontratë të re me Chelsean. Duke ardhur përmes akademisë këtu ishte një moment i veçantë për mua që të bëja debutimin në ekipin e parë vitin e kaluar, para se të fitoja përvojë të mëtejshme në huazim në Vitesse sezonin e kaluar. Unë dua të rritem mbi këto baza dhe me të vërtetë pres që të përparoj dhe të jap më të mirën për Chelsean në vitet që vijnë. “.