Alessandro Del Piero, legjenda e Juves, foli për kanalin Twitch të “Zonjës së Vjetër” pas vizitës që i bëri ekipit në Los Angeles. Ish-kapiteni i Juventusit shpjegoi se kishte krijuar përshtypje mjaft pozitive:
“Ka djem që kanë cilësi të jashtëzakonshme me qëndrimin e duhur për të bërë mirë dhe për ta kuptuar peshën e kësaj fanelle.”
Del Piero tha se ishte shumë i impresionuar nga Vlahovic, por nuk mungon mesazhi i tij edhe për Chiesan:
“Pati një sezon të jashtëzakonshëm deri në momentin e dëmtimit. Shfrytëzoj rastin t’i uroj fat për rikthimin e tij të shpejtë.
Të gjithë po presin me padurim ta shohin përsëri në fushë”.
Ish-numri 10 bardhezi më pas komentoi shumë pozitivisht afrimin e Angel Di Marias:
“Mendoj se është një nënshkrim fantastik për Juventusin, është një djalë që ka cilësi të jashtëzakonshme. Di Maria është shumë efektiv, kjo është diçka që më pëlqen.
Ka shumë personalitet dhe një të kaluar tepër të rëndësishme dhe të lavdishme sa i përket përvojës dhe trofeve të fituar. Nuk mund të kishte afrim më cilësor për Juven. E takova dhe më konfirmoi atë që mendoja”.
