Përmes një komunikate në faqen zyrtare, Federata Shqiptare e Futbollit (FSHF) e ka konfirmuar se mesfushori Klaus Gjasula do të mungojë për dy ndeshjet e radhës ndaj Moldavisë dhe Ishujve Faroe.
Kombëtarja e Shqipërisë do të zhvillojë ndeshjet ndaj Moldavisë dhe Ishujve Faroe në kuadër të kualifikimeve drejt Evropianit Euro 2024.
“Departamenti i Komunikimit në FSHF bën me dije se futbollisti ka pësuar një dëmtim fizik dhe i është nënshtruar analizave mjekësore në ditët e fundit në bashkëpunim edhe me stafin mjekësor të Kombëtares.
Pas daljes së rezultateve dhe konsultave stafi mjekësor ka konkluduar se Gjasula nuk mund të jetë i gatshëm për dy ndeshjet e Shqipërisë dhe lojtari do të nisë ndërkohë fazën e rikuperimit pranë klubit të Darmstad”, shkruhej në komunikatën e FSHF-së.
Shqipëria do të luajë me Moldavinë si vendase më 17 qershor, kurse tre ditë më vonë, respektivisht, më 20 qershor luan si mysafire ndaj Ishujve Faroe.