Federer eklipson CR7 dhe Messi, ja sportistët më të paguar në vitin 2020

Sporti

Federer eklipson CR7 dhe Messi, ja sportistët më të paguar në vitin 2020

Më: 20 dhjetor 2020 Në ora: 07:50
Federer, Messi, CR7

Roger Federer ka kaluar legjendat e futbollit, Cristiano Ronaldo dhe Lionel Messi, si sportisti më i paguar në vitin 2020. Asi zviceran parakalon dyshen e futbollit, pavarësisht se ka humbur pjesën më të madhe të sezonit për shkak të dëmtimit dhe pandemisë së koronavirusit. Federer është gjithashtu ndër të famshmit më të paguar në botë, me paratë e çmimit të karrierës dhe të tjera, që e vendosin atë përkrah më të pasurve në biznes.

Sipas listës së “Forbes”, referuar të famshmëve më të paguar në këtë vit kalendarik, dy vendet e para i përkasin yllit të televizionit, Kylie Jenner, me 590 milionë dollarë dhe kunatit të saj, Kanye West (170 milionë dollarë). Pastaj  vjen Roger Federer, që i tejkaloi të gjithë sportistët me një fitim marramendës prej 106.3 milionë dollarë.

Pesë herë fituesi i “Topit të Artë”, ylli i Juventusit, iu afrua eklipsimit të Federer, por në fund të fundit nuk arriti dot. Portugezi fitoi këtë vit 105 milionë dollarë. Pjesa më e madhe e fitimeve të 35-vjeçarit vijnë nga paga, që Juventus i paguan, e cila raportohet të jetë 64 milionë dollarë në vit për kohëzgjatjen e kontratës së tij në Torino. Ish-ylli i Real Madridit, gjithashtu ka një gamë veshjesh dhe parfumesh, së bashku me një zinxhir fitimprurës hotelesh.

Rivali i tij për një kohë të gjatë dhe kapiteni i Barcelonës, Lionel Messi, është i pesti në listë. E thënë ndryshe, argjentinasi pozicionohet i treti në mesin e listës së këtij viti të sportistëve më të paguar. Gjashtë herë fituesi i “Topit të Artë” ka një marrëveshje gjatë gjithë jetës me “Adidas”, ndërsa paga e tij në Barcelonë vlerësohet të jetë 80 milionë dollarë në vit. 33-vjeçari ka një kontratë deri në qershor 2021, pas së cilës ka të ngjarë të largohet nga klubi i tij i zemrës.

Sportistë të tjerë në listën e 10 personave të famshëm më të paguar në vitin 2020 janë: Neymar, ylli i PSG, në vendin e shtatë me fitime prej 95.5 milionë dollarë. Braziliani është nën kontratë 5-vjeçare, në vlerën prej 350 milionë dollarësh me PSG, ndërsa mbështet nga marka të njohura si “Nike”. Ikona e NBA-së, LeBron James, është i nënti në listë, me 88.2 milionë dollarë. Në vitin 2018, basketbollisti në fjalë u transferua te Los Angeles Lakers për një kontratë 4-vjeçare, me vlerë 153 milionë dollarë. Kohët e fundit nënshkroi një zgjatje të saj me vlerë 85 milionë dollarë. James gjithashtu ka kompaninë e tij të prodhimit dhe marrëveshje sponsorizimi me Nike, Beats, Walmart dhe GMC.

Nëse fokusohemi vetëm te sportistët, kjo është renditja e 10 më të paguarve në vitin kalendarik, që po i afrohet fundit:
1.Roger Federer – 106.3 milionë dollarë
2.Cristiano Ronaldo – 105 milionë
3.Lionel Messi – 104 milionë
4.Neymar – 95.5 milionë
5.LeBron James – 88.2 milionë
6.Dwayne “The Rock” Johnson – 87.5 milionë
7.Stephen Curry – 74.4 milionë
8.Kevin Durant – 63.9 milionë
9.Tiger Woods – 62.3 milionë
10.Kirk Cousins – 60.5 milionë

commentFirst article
Sot mund të lexoni Shfletoni kopertinat