Kurrë më nxehtë apo më dramë sa i përket garës për president të Komitetit Olimpik të Kosovës!
Znj. Linda Shala, një emër i respektuar dhe i njohur i sportit, veprimtare e shquar e basketbollit, nënpresidente e Federatës së Basketbollit të Kosovës, edhe zyrtarisht është kandidate për presidente, po ashtu dhe z. Ismet Krasniqi, president i Federatës së Karatesë së Kosovës.
Znj. Shala dhe z. Krasniqi janë kundërkandidatët e presidentit aktual z. Besim Hasani.
Raportohet nga burimet zyrtare, se edhe ish futbollistja e mirënjohur Afërditë Fazlija, do t’ia mësyjë pozitës së presidentes së Komitetit Olimpik të Kosovës.
Gjithnjë duke iu referuar burimeve të sigurta, znj. Afërditë Fazlija, aktualisht selektore e Kombëtares së Kosovës në futboll (femrat) dhe zëvendësdrejtoreshë e Departamentit të Sportit të Kosovës, ka presione nga shumica e federatave sportive, që ajo gjithsesi të kandidojë për presidente.
Fazlija as nuk e mohon e as nuk e pohon! Gjithçka do të shihet gjatë këtyre ditëve, a do ta kemi kandidaturën e katërt për president të KOK-ut. Dramë e madhe, gara do të jetë më e ashpra në historinë e KOK-ut. Fundi i marsit, java e parë e pranverës së bukur, me temperatura rreth 22-24 gradë, në anën tjetër deshëm apo nuk deshëm, do të jetë vapë tropikale për garën e presidentit të KOK-ut.
