Antoine Griezmann mund të kishte shënuar golin e tij të pestë në një Kupë Bote, të parin për Katar 2022, në ndeshjen ndaj Tunizisë. Por për çudinë e të gjithëve, goli i tij në minutat shtesë të sfidës u anulua nga gjyqtari pas një thirrje nga VAR-i dhe një pritje prej 2 minutash.
Gjyqtari ka cilësuar Grizman në pozicion jashtë loje në momentin që Çuameni harkonte topin, edhe pse lojtari nuk ka kontakt me sferën dhe ecën në drejtim të kundërt me mbrojtësin tunizian që ia kthen atij duke i dhënë mundësinë që të shënonte.
Vetë Griezmann ka deklaruar pas ndeshjes se nuk e kuptonte se pse i ishte anuluar ky gol dhe ia kishte shpjeguar edhe gjyqtarit kryesor.
“Te krosimi jam në pozicion jashtë loje, por nuk ka rëndësi.
I thashë edhe gjyqtarit që nuk kisha si qëllim të shkoja dhe gjuaja te krosimi, por mbrojtësi gabon largimin ndaj edhe unë marr topin përsëri”, tregoi sulmuesi francez pas sfidës për episodin që bëri të lindin shumë diskutime në fund të ndeshjes së sotme rreth interpretimit të rregullit.
