Real Madridi ka fituar pesë nga gjashtë ndeshjet e para në La Liga, por niveli i lojës së skuadrës së José Mourinhos nuk ka bindur një pjesë të konsiderueshme të tifozëve.
Sipas një raportimi të gazetës “Sport”, klubi madrilen vazhdon të vuajë nga të njëjtat probleme që më herët i kushtuan postin Carlo Ancelottit, çuan në largimin e Xabi Alonsos dhe e reduktuan eksperiencën e Álvaro Arbeloas në pankinë në një periudhë të shkurtër.
Raporti e përshkruan situatën si një skuadër ku yjet kanë fituar shumë ndikim, ndërsa egoja brenda dhomës së zhveshjes po dominon mbi interesin kolektiv.
Mourinho nuk ka më kontrollin e dikurshëm
Në periudhën e tij të parë te Real Madridi, Mourinho sundonte dhomën e zhveshjes falë personalitetit, autoritetit dhe disiplinës së tij.
Megjithatë, konteksti aktual është krejtësisht tjetër.
Ky nuk është më Real Madridi i vitit 2010 dhe, sipas “Sport”, as Mourinho nuk është më trajneri energjik dhe konfrontues që ishte 15 vjet më parë.
Vetëm shtatë ndeshje – gjashtë në La Liga dhe një në Ligën e Kampionëve – kanë mjaftuar që një pjesë e tifozëve të krijojnë përshtypjen se problemet e skuadrës nuk kanë ndryshuar.
Në moshën 63-vjeçare, Mourinho shihet si një figurë më e qetë dhe, sipas gazetës katalanase, ai po tregohet veçanërisht mbrojtës ndaj Vinícius Júnior edhe në momentet kur braziliani nuk është në formën më të mirë.
Humbja e Rodrit ishte një goditje e madhe
Një tjetër çështje që raportohet se ka ndikuar te Mourinho është transferimi i Rodrit te Barcelona.
Sipas burimeve brenda klubit, trajneri portugez kishte biseduar dy herë me mesfushorin spanjoll dhe besonte se marrëveshja për transferimin e tij te Real Madridi ishte shumë pranë realizimit.
Mourinho thuhet se kishte krijuar menjëherë një raport të mirë me lojtarin.
Megjithatë, drejtuesit e Real Madridit vonuan negociatat me Manchester Cityn dhe Rodri në fund zgjodhi Barcelonën.
“Sport” pretendon se ky zhvillim e goditi fort Mourinhon.
Gazeta shton se Real Madridi i sezonit 2026/27 po përsërit shumë prej gabimeve të skuadrës që nuk ka fituar trofe gjatë dy sezoneve të fundit.
Mourinho erdhi duke premtuar rezultate dhe rikthimin e mentalitetit fitues, por humbja e parë ndaj Real Betisit në Sevilla ngriti menjëherë pikëpyetje mbi identitetin e skuadrës.
Real Madridi nuk bind as në mbrojtje
Mourinho ka folur për një skuadër më të uritur për fitore, por në praktikë Reali shpesh përfundon duke u tërhequr në zonën e vet dhe duke luajtur me një bllok të ulët defensiv.
Vetë Mourinho ka pranuar se një stil i tillë nuk është pikërisht ajo që dëshiron.
Edhe në fitoren ndaj Interit në Ligën e Kampionëve, Real Madridi përfundoi duke pritur vërshëllimën e fundit, ndërsa Thibaut Courtois u detyrua të bënte disa pritje vendimtare.
Problemi më i madh është se skuadra nuk po arrin as të mbrohet në mënyrë bindëse.
Espanyol, Real Sociedad, Real Betis, Inter, Rayo Vallecano dhe Elche kanë arritur të shënojnë ndaj Realit.
E vetmja ndeshje pa gol të pësuar ishte ajo ndaj Malagas.
Pothuajse çdo kundërshtar arrin të krijojë raste, ndërsa Courtois vazhdimisht duhet të ndërhyjë për ta shpëtuar skuadrën.
Vinícius dhe Mbappé në qendër të debatit
Marrëdhënia e Mourinhos me yjet e skuadrës është gjithashtu një temë diskutimi.
Ajo nuk është aq e afërt sa marrëdhënia pothuajse familjare që kishte Ancelotti me lojtarët, por njëkohësisht nuk është as aq kërkuese sa ajo e Xabi Alonsos.
Mourinho madje ka vlerësuar publikisht ndërhyrjet defensive të Viníciusit, duke deklaruar:
“Një lojtari që jep gjithçka që ka nuk mund t’i kërkosh të japë më shumë.”
Megjithatë, Vinícius është lojtari i dytë me më shumë minuta në skuadër, me 511 minuta, edhe pse ka realizuar vetëm një gol në gjashtë ndeshje.
I pari për minuta është Kylian Mbappé.
Edhe francezi është në qendër të kritikave, ndërsa një pjesë e tifozëve të Real Madridit e konsiderojnë atë ndër arsyet pse skuadra nuk ka arritur të fitojë trofe gjatë dy viteve të fundit.
Mourinho nuk pajtohet me këtë vlerësim.
“Një lojtar që shënon 40 gola nuk mund të jetë problem”, ka deklaruar ai.
Rënia e ritmit në pjesët e dyta
Një tjetër problem i dukshëm është mënyra se si Real Madridi ul ritmin pasi krijon avantazh ose kontroll mbi ndeshjen.
Pjesët e dyta janë bërë veçanërisht problematike.
Ndaj Real Betisit, Madridi shpërdoroi raste në pjesën e parë dhe më pas lejoi kundërshtarin të rikthehej në lojë.
Një skenar i ngjashëm u pa edhe ndaj Espanyolit, ku madrilenët duhet ta kishin mbyllur shumë më herët ndeshjen, përpara se Carlos Espí të realizonte në kohën shtesë.
E njëjta tendencë u shfaq kundër Elches dhe Interit.
Ndaj skuadrës italiane në Bernabéu, Real Madridi kryesonte 2-0 pas pjesës së parë, por Interi iu afrua barazimit pas pushimit.
Mesazhe indirekte për tifozët
Në periudhën e tij të dytë në Madrid, Mourinho po përdor një qasje më diplomatike sesa deklaratat frontale që e karakterizonin dikur.
Pas humbjes ndaj Betisit, ai nënvizoi faktin se tifozët vendas e kishin mbështetur skuadrën e tyre gjatë gjithë 90 minutave dhe nuk e kishin fishkëllyer.
Kjo u interpretua si një mesazh indirekt për tifozët e Real Madridit në Santiago Bernabéu.
Pas ndeshjes ndaj Elches, Mourinho kritikoi gjithashtu numrin e madh të rasteve të humbura, duke theksuar se skuadra duhej ta kishte zgjidhur ndeshjen që në pjesën e parë.
Megjithatë, këto mesazhe shpesh alternohen me deklarata më pesimiste, diçka që ka shtuar frustrimin e tifozëve edhe pse sezoni është ende në fazat e para.
Derbi mund të jetë pika e kthesës
Real Madridi tani hyn në derbin e Madridit në një moment delikat.
Kjo ndeshje mund të bëhet një pikë kthese, por mund edhe ta përkeqësojë situatën, ashtu siç ndodhi sezonin e kaluar gjatë periudhës së Xabi Alonsos.
Humbja në Metropolitano atëherë kishte shkaktuar përplasjen e parë mes Jude Bellingham dhe trajnerit.
Vetëm pak ditë më vonë, gjatë udhëtimit në Kazakistan, Fede Valverde shprehu pakënaqësinë e tij publikisht, ndërsa Vinícius nuk e fshehu irritimin pasi u zëvendësua.
Një skenar i tillë nuk duket aq i mundshëm me Mourinhon.
Megjithatë, sipas raportit, frika që lojtarët kishin nga trajneri portugez në fillim tashmë është shndërruar thjesht në respekt.
Mourinho nuk shihet më si figura strikte dhe konfliktuoze e periudhës së tij të parë në Madrid.
Kjo ka bërë që yjet e skuadrës të kenë më shumë hapësirë për të vepruar sipas dëshirës së tyre.
Vinícius madje la të kuptohej përmes rrjeteve sociale se pret të luajë në derbin në Metropolitano, pavarësisht paraqitjes së dobët ndaj Elches.
Ka argumente sportive që mund të çojnë në lënien e tij jashtë formacionit.
Por, sipas “Sport”, Mourinho i sotëm nuk është më ai Mourinho që Real Madridi njihte dikur.