Federata e Pingpongut të Kosovës ka njoftuar se nga data 11 deri më 14 dhjetor do të zhvillohet një kamp i veçantë stërvitor, i cili do të udhëhiqet nga trajnerja e njohur ndërkombëtarisht, Andreja Ojstersek. Ajo njihet veçanërisht për punën me lojtarin e famshëm Darko Jorgic dhe përvojën e saj të gjerë në arenën ndërkombëtare të pingpongut.
Gjatë këtij kampi, Ojstersek do të shoqërohet nga Drejtori i Përfaqësueses, Petrit Drenica, si dhe nga pjesëtarë të tjerë të stafit të përzgjedhur. Kampi do të mbledhë së bashku lojtarë të rinj e të talentuar nga Kosova dhe Shqipëria, duke u ofruar atyre mundësinë të përmirësojnë teknikën, strategjitë dhe përvojën praktike në sportin e pingpongut.
Sipas FPPK-së, ky kamp synon të nxisë rritjen e cilësisë dhe përgatitjes së gjeneratave të reja, duke forcuar gjithashtu komunitetin sportiv dhe krijuar më shumë hapësira për zhvillim. Pjesëmarrësit do të kenë mundësinë të mësojnë drejtpërdrejt nga metodat dhe qasjet profesionale të trajneres Ojstersek, të cilat janë dëshmuar në garat elitare.
Federata ka theksuar se ky organizim është realizuar falë bashkëpunimit të shkëlqyer mes kryetarit të FPPK-së, Jeton Oruçi, dhe Federatës Sllovene, duke ndërtuar ura të reja partneriteti në të mirë të sportistëve të rinj.